Dehqon va uning xazinasi

Qadim zamonda bir keksa dehqon yashagan ekan. U o'g'illarining dangasaligidan qayg'urar edi.

Vafoti oldidan o'g'illarini chaqirib: «Bog'imizda xazina ko'milgan, uni topsangiz, umrbod muhtojlik ko'rmaysiz», — debdi.

Otasi vafot etgach, o'g'illar bog'ning har bir qarichini chuqur qazib chiqishibdi. Xazina topilmabdi, ammo yaxshi ag'darilgan yer o'sha yili misli ko'rilmagan hosil beribdi.

Shunda to'ng'ich o'g'il tushunibdi: otamiz aytgan xazina — mehnatning o'zi ekan.

Mehnat — hamma narsaning boshi. Ter to'kib topilgan non eng shirin non bo'ladi.